Wednesday, May 30, 2007

وأنا صغير


وأنا صغير كنت لما بزعل بصفى على طول

وأنا صغير كنت لما بضحك ، بضحك من قلبي أوي

وأنا صغير كان أي حد يديني شكولاتايه كنت أحبه أوي بغض النظر هو مين ؟؟

وأنا صغير مكنش عندي أي هموم

وأنا صغير كنت اتخانق مع صحبي ونضرب بعض وتلاقينا بتلعب مع بعض بعد شويه

وأنا صغير كنت بنط ... بجري ... بطير ... بكسر ... بخرب ....بعلب ... بعيط بعمل كل الحاجات ديه في لحظة واحده .

وانا صغير كنت أوسخ نفسي واقطع هدومي ومتكسفش إني اظهر قدام الناس زي ما أنا .

وانا صغير كنت بنام كتيييير وبنام في أي مكان تحت السرير ...على الكنبة ... فوق السفرة ...على حجر ماما

وأنا صغير كنت أي حد أحبه اجري عليه واحضنه وأبوسه من غير ما أسأل نفسي أنا بحبه ليه ومن غير ما أقوله إني بحبه بس هو كان بيحس إني بحبه أوي

وأنا صغير كان كل الناس بيهتموا بيه

وأنا صغير كنت شقي أوي

وأنا صغير مكنش حد بيعرف يزعل منى

وأنا صغير كان نفسي أكبر ...

بس لما كبرت لاقتني بأقول وأنا صغير ......

Thursday, May 24, 2007

الحٌر من راعى وداد لحظة

إلى كل صديق كان ولازال في حياتي ، إلى كل إنسان قابلته وعرفته وأحببته
إلى كل من كان بعيداً عني وظل قريباً مني

إلى كل من لا أتذكر له إلا ذكرى جميلة في حياتي

إلى كل من أسعد قلبي ولو للحظة

إلى كل من علم قلبي الصبر

إلى كل من داوى همي

إلى كل من أحببته قبل أن أحبه

إلى كل إنسان سأحبه ولم أره بعد

إلى كل من سهل علي حبه واستحال علي قلبي بغضه


شكراً

Saturday, May 19, 2007

عتاب المحبين كمطر الصيف ، يمضي سريعاً ، ويترك الدنيا أكثر نضارةً وجمالاً


بحب بالحكمة ديه أوي

وممكن الدرس اللي أتعلمته اليومين اللي فاتوا مع حد بحبه أوي هو اللي خلاني أحس بيها
اختلفنا في موضوع ملعبك أوي فتعاتبنا وطبعا كل واحد أصر على رأيه وحاول يقتع الثاني بيه و كعادة البشر محدش عايز يقول هو غلطان وكل واحد هدفه تنفيذ رأيه ومحدش عايز ينزل على رأي الثاني ..

وزاد الاختلاف في وجهات النظر أوي .....

وعدي يومين وزاد التوتر وبعدها قررنا إننا نتكلم بس بشكل أحسن وكان شعار الحوار تعال نتغافر لا نتعاتب .

كل واحد فينا كان هدفه في الحوار الثاني اللي تم بيننا انه يوصل لنقطة التغافر مع التاني كل واحد كان بيدور في الحوار على نقاط الاتفاق وفعلا اتقلب الحوار لاقيت نفسي بأقول أنا غلطان في كذا كذا والطرف الثاني قال وأنا كنت غلطان في كذا انا كمان ..

كان حوار رائع .

ومن هنا بأقول لما تزعل من حد بتحبه أو تختلف معاه خلى هدفك انك تتغافر معاه مش تتعاتب معاه .


فعتاب المحبين كمطر الصيف ، يمضي سريعاً ، ويترك الدنيا أكثر نضارةً وجمالاً


أخيرا أشكر الشخص اللي علمني كيف يكون العتاب اقصد التغافر .

Saturday, May 12, 2007

يوجد دائماً من هو أشقى منك , فابتسم




الفترة اللي فاتت كان فيه ناس كتير من صحابي مهمومة مش عارف ليه كلهم مرة واحدة كده ؟؟

فقلت هتبقى حلوة أوي الحكمة ديه لو الواحد حطها قدامه لما يتضايق أو لما يزعل أو لما الدنيا تلبخ معاه شويه

إلى كل أصدقائي اللي بحبهم جدا واللي بيمرو بظروف صعبة أو بهموم بأقول لهم

يوجد دائماً من هو أشقى منك , فابتسم

Sunday, May 06, 2007

يبقى انت أكيد .....أكيد في مصر


كنت بقلب في ميلاتي القديمة بدور على حاجه لاقيت ميل جميل كنت مسمية يبقى أنت أكيد في مصر...المهم جبت حبة صور كنت مصورها (صورتين بس )على صور الميل وقلت اسيبكم تعيشوا معاه أصلى اليومين دول بينتابني حالة حب لمصر غريبة

بحبك يا حمار علشان بتفكرني بحد عزيز عليا وعلى كل المصرين



عيب يا دكتور تترجم اسمك كده!! طيب اسيبك تحط ايدك في بقي ازاي ؟؟




كل ده علشان يسرق ربع متر من الشارع


حب في المصيف

لا تعليق

الشقة اللي في العمارة ديه بتمشى فيها بالجنيب وشقة اتجاة واحد

خدني في حنانك خدني

سلطان زمانك


هي ديه عربية انقاذ العربيات في مصر




كان ناقض يكتبوها بالحبر السري






طبعا انت درست العلامة ديه وانت بتطلع رخصة -المشكلة لو العربية اوتوماتيك




الملافظ سعد





علشان الخواجات يفهموا



لما تروح هناك اطلب كوكتيل



يبقى يورينا الحرامي هيسرق الشبشب ازاي بس المشكلة ان القفل اغلى من الشبشب !!ا

بصراحة الصورة ديه مش عارف اتصورت فين بس تحفة


اضحك الصورة تطلع حلوة

عمار يا مصر

Saturday, May 05, 2007

طب من بقك


"المواطن المصري أصبح ارخص مواطن في الدنيا"


كلمة بيرددها ناس كتير بس حسيت بمعناها اوي اليومين اللي فاتوا دول .
حصل موقف مع والد واحد صحبي بحبه اوي مش عارف لو كان حصل في أي دولة محترمة كان ايه اللي هيحصل ؟؟

والده عنده فشل كلوي بقاله 9 سنوات بسبب مياه مصر الصحية الصالحة لشرب الآدمي اللي كلنا بنشربها كل يوم وكان بيعمل غسيل كلوي 3 مرات في الأسبوع تقريبا والجميل انه بيغسل في احد مستشفيات مصر الكبيرة اللي في المهندسين بحكم انه صاحب مركز مرموق وشغله بيدعمه بجزء من العلاج لحد كده كويس؟؟

المهم راح مرة يغسل كالعادة في المستشفى المرموقة نسى موظف المستشفى "الممرض " المحترم المحلول في أيده لحاد أما دخل هوا في جسمه فنقل إلى العناية المركزة في حالة خطيرة وتم إنقاذه بصعوبة طبعاً لما تسمع الكلام ده تقول ايه الإهمال وعدم احترام البشر ده بس ثواني لسه القصة مخلصتش .
وهما بينقذوه من إهمالهم الاولاني موظف محترم تاني برضة "واضح إن كل المستشفى موظفين محترمين" بيحط للراجل محلول علشان ينقذه طلعت الإبرة بتاعة المحلول ملوثة فعمل للراجل اللي هما المفروض ينقذوه من إهمالهم الاولاني تلوث ميكروبي في جسمه ومن يومها والرجل في حالة خطيرة في المستشفى .

السؤال الآن المفروض لما الواحد يتعب في مصر يروح لمين ؟؟؟

مش عارف أقولك إيه يا اشرف يا صحبي ومش عارف أساعدك باية غير إني ادعيلك إن ربنا يخفف عن والدك وعن مرضى المسلمين .

وياريت أي حد يقرأ البوست ده يدعي لعمو متولي درويش ان ربنا يعافيه .

وطب من بقك