Thursday, December 18, 2008

لما تلاقي نفسك في حفرة أول حاجه تعملها انك تبطل حفر


حكمة بسيطة وجميلة والكل يسمعها يقول صح مع هز الرأس ورفع الحاجب بس في الواقع اغلبنا بيكمل حفر بكل استذكاء (وهى درجة أعلى من الذكاء)


حد دخل نفسه في ورطة قبل كده وبدل ما يفوق انه في حفرة فضل يكمل حفر لحاد اما بقى الطلوع صعب


حد لقى نفسه في حفرة قبل كده ولقى نفسه بغباء عمال يكمل حفر لحاد اما فاق وقال ايه اللي عملته ده وبعدبن كمل حفر وبعدين فاق بجد لما لقى نفسه في الغويط .


نصيحة عبيطة وسهلة بس برغم سهولتها مش هتعملها


لما تلاقي نفسك في حفرة اول حاجه تعملها انك تبطل حفر

Tuesday, November 25, 2008

لما الحياة تديك مائة سبب يخلوك تعيط وريها انك عندك ألف سبب يخلوك تضحك



كتير اوي تلاقي الحياة والظروف والناس عمالين يقنعوك بميت سبب يخلوك حزين ومكتئب. ولما حد يشوفك بتضحك الصبح تلاقيه بيقولك باستغراب ايه اللى مفرحك على الصبح كده!! وكأن الصبح هو وقت النكد والظهر هو وقت الحزن وبالليل طبعا هو وقت الاكتئاب.

لما تلاقي الحياة بتقنعك بالنكد والحزن لازم ساعتها تبص للناحيه التانيه منها ولازم ساعتها تقنع نفسك و العالم كله انك عندك ألف سبب يخليك سعيد .


أتعلمت حاجه جميلة أوي من سفر اخويا لما الدنيا بتسود هنا ويكون ليل كحل ... اكلمه ألاقي عنده نور والعصافير بتزقزق حواليه


ساعتها أدركت إن مهما كانت الظلمة اللي أنت فيها لو دورت هتلاقي حته فيها نور حتي لو بعيده أوي بس المهم ان فيه نور .

وساعتها حسيت ان حتى لو الدنيا كلها منكده عليك وعماله تقنعك انك لازم تكون حزين ومخنوق وانت لسه واقف على رجلك وبصحتك ديه لوحدها تخليك اسعد انسان في الكون واللي مش مصدق يروح القصر العيني ويتفرج هناك .


لو معاك فلوس تمشيك لأخر اليوم بس أنت مفيش منك كتير اليومين دول .

أوعه تخلي حد يقنعك انك تكون حزين اقنع الكون كله انك تكون سعيد لأنك ببساطة عندك أسباب اكتر للسعادة .

Sunday, November 09, 2008

جميل ان نموت من أجل من نحب ، ولكن الأجمل أن نحيا من أجله


بسمع ناس كتير لما بتحب حد قوي بتقوله بموت فيك لو خدنا بالنا من الكلمة ديه هنلاقي ان اصعب حاجه في الوجود ان حد يكون بيحبك اوي ويموت فيك ، أصل موت حد فيك ده حاجه قاتله .

ممكن يكون الاجمل انا نقول للي بنحبه بعيش بيك علشان وجود الناس دول معانا في الحياة هو فعلا الحياة .

حلو اوي اننا نموت علشان حد بنحبه أوي

بس والله اجمل كتير اننا نعيش علشانه ، علشان نقدر نفرح ونفرحه نستمتع بوجوده معانا ويستمتع بوجودنا .

جميل أوي ان حد يمشى قدامك علشان يحميك بس الاجمل انه يمشى جنبك وايده في ايديك .

موتنا من اجل الحق رائع ولكن اننا نعيش ونحن نستمتع به هذا هو المتعه الحقيقية بكل تأكيد

نصيحة

حاول انك تعيش بالناس اللي بتحبهم بدل ما تموت فيهم

Sunday, October 19, 2008

إن كان الحب ضعفاً ... فهو ضعف القلوب العظيمة



صديقي الحزين ...

إذا أحببت فأخفقت فلا تخجل ولا تحزن
فخير لنا أن نحب فنخفق، من أن لا نحب أبداً......

و إذا كنت قد مررت بلحظات ضعف في حبك فلا تندم عليها...
فان كان الحب ضعفاً فهو ضعف القلوب العظيمة...

و إذا مررت بلحظات خوف فلا تستعجب منها فمن أحب بشدة خاف بشدة..

صديقي أقسم لك انك ستبتسم مرة أخرى وانك ستحب مرة أخرى

ولكن تعلم مما فات

ولا تندم كثيرا على ما مر ..... فقد تعلمت منه الكثير.

تبا لمن علمونا البكاء وما كنا نعرفه ويا ليتهم علمونا كيف نبتسمٌ


صديقي الحزين ابتسم فانا معك

Saturday, October 04, 2008

إذا كان وجود الشوك في الورود يحزننا فإن وجود الورود وسط الشوك يفرحنا



لم يكن رمضان هذا العام كباقي الاعوام ...

فقد رأيت فيه أفقر الناس ووجدت بجوارهم أكرم الناس .

رأيت الظلم وهو يحاول ان يفتك ببعض الناس ورأيت الحق في وسط الظلم يذود عنهم .

رأيت أناس تسلب منهم حياتهم تحت الضحور ورأيت أخرين تدب فيهم الحياة فوق الصخور بعد ان عاشوا امواتاً لعقود وكأن الموت جاء ليرد الحياة لقلوبهم .

رأيت رجال سلبت منهم ابسط معاني النخوة والرجوله ورايت نساءً الواحدة منهم بمائة من هؤلاء .

فتعلمت اننا يمكن انا ننظر الى نفس المشهد ولكن نراه بشكل مختلف .

فوجود أناس تحت مستوى الفقر آالمني كثيراً ولكن عندما وجدت شباب وشابات يضحون بوقتهم وجهدهم ومالهم لاسعاد هؤلاء رأيت حينها الورود وسط الاشواك .

فوجود الشوك حول الورد لا يعني اننا يجب ان نحزن لوجوده حوله ولكن يجب ان نفرح ان الورد وجد له مكاناً وسط الاشواك .
تحياتي للورد

Tuesday, September 23, 2008

الكل بنشر السعادة


فبعض الناس ينشر السعادة أينما ذهب


والبعض الآخر يخلّفها وراءه إذا ذهب


فأي الصنفين أنت ؟؟


عذراً
فلا عزاء للصنف الثالث

Wednesday, September 10, 2008

لا تنتظر أن تكون سعيداً لكي تبتسم، ابتسم لكي تكون سعيداً




بعد سنوات من البحث والتنقيب عن السعادة اكتشفت

إننا مبطلناش ضحك علشان كبرنا .... إحنا كبرنا علشان بطلنا نضحك

حتى لو الدنيا سودة والبلد دخلة طريق ظلمة والقرف حولينا في كل مكان

حتى لو مش لاقي شغل أو قرفان من شغلك

حتى لو فقدت حد بتحبوا او بتحب حد ومفتقدوا

حتى لو معكش فلوس وعليك التزامات تهد جبال

لو هتستنى كل الحاجات ديه تتحل علشان بعدما تتحل تبقى سعيد ممكن تموت من غير ما تلحق تضحك الأحسن, اضحك وابتسم وكله هيتحل

ولو متحلش حتى ... مش انت كان نفسك تتحل علشان تكون سعيد..... اديك سعيد من غير حاجة

أصل ممكن من كتر ما انت قاعد مستني السعادة تفقد احساسك بيها لما تيجي

دور انت عليها وهتلاقيها من أول خطوة في مشوارك بس انت قوم ومستنتاش حاجه

Sunday, August 24, 2008

إذا كنت لا تستطيع أن تطعم مائه شخص فاطعم شخصاً واحداً


وإذا كنت لا تستطيع أن تسعد المئات فاسعد شخصاً واحداً


وإذا كنت لا تستطيع أن تحقق كل حلمك فحقق ما تستطيع منه واسعد به


وإذا كنت بحساباتك غير قادر على الوصول لأخر الطريق فسيرك في أول الطريق يكفيك


فإذا كان إدراك الكل مستحيلا فإدراك البعض ممكن


وإذا كان إرضاء الكل غاية لا تدرك فإرضاء ربك غاية تدرك



موتك وأنت في الطريق لتحقيق حلمك هو تحقيقك لحلمك

Wednesday, July 30, 2008

من كتم دائه قتله


حينما نغض الطرف عن دائنا
وعندما نسمى الأشياء بغير أسمائها
فنسمى خوفنا من الأشياء تروي وحرص ونسمى فشلنا تآمر من الكون علينا ونسمي حزن يختبئ في ابتسامه سعادة

عندما نيقن بالمرض ولا نسرع بالعلاج
لاننا لانريد أن نعترف أننا مرضى فكثير منا يرفض إجراء الفحص لأنه لا يريد أن يكتشف انه مريض
كالنعامة اذا رأت الخطر دست رأسها في الرمال كي لا ترى... لتقنع نفسها أن الخطر قد زال وفي الحقيقة انه يقترب ليفتك بها

حينها تكون بداية النهاية
لأننا سوف نفيق عندما تكون النهاية قد حانت...... والبعض يفيق بعد النهاية
والأعجب
من لا يفيقوا حتى بعد النهاية

عجبى

Thursday, July 17, 2008

عندما تجد نفسك فحافظ عليها


هل حقا يمكن أن نعيش لسنوات ونحن متخاصمين مع أنفسنا دون أن نشعر ؟


هل نكون أحيانا حمقى في إفناء حياتنا في البحث عن المال والزوجة و الشهرة ونحن قد تجاهلنا أننا قد أضعنا أنفسنا في الطريق ولم نبحث عنها ؟


لماذا تكون أنفسنا هي أول وأكثر من نظلم مع أنها اغلي ما لدينا في تلك الحياة؟


اكتشفت أنني خاصمتها كثيرا ولم أشعر بها ، اكتشفت أني يمكن أن أظلمها بكثير من التصرفات .

حبيبتي نفسي أأسف لك كثيرا


أخيرا وجدتك وتحدثت معك بكل صراحة
نصيحة
إذا وجدتها فحافظ عليها

Monday, July 07, 2008

عارفه أحلى حاجه فيكي إيه


أحلى ما فيها أنها لما بتقسى بتحن

أجمل ما في ليلها انه بعديه فجر صافى

أجمل ما يأسك فيها انها بترميلك أمل تمسك فيه علشان تعرف تكمل

أجمل ما فيها انها بتدوقك الحلو بعد المر وبعدين تذوقك المر تاني علشان ما تنساش طعمة


أجمل ما فيها انها فيها كل حاجه


أجمل ما فيها لو فهمتها ....هتعشها صح


الحمد لله على حاجات كتير أوي مش عارف أعدها

Friday, June 27, 2008

لما الدنيا ترخم


إن حظي كدقيق فوق شوك بعثروه

ثم قالوا لحفاة يوم ريح اجمعوه

صعب الأمر عليهم قلت يا قوم اتركوه

إن من أشقاه ربي كيف انتم تسعدوه

Saturday, June 14, 2008

شكراً للأشواك علمتـني الكثير


اذا كنا نتعلم من ساعة الم أضعاف ما نتعلمه من سنة فرفشة


فالأشواك تعلمنا كيف نتقيها...


وإذا جرحتنا تعلمنا كيف نتحمل أذاها


وحين يطول أذاها تعلمنا كيف نصبرعليه


وعندما نتعافى منها او نتقيها تعلمنا كيف نشكر .


فلولا الأشواك في حياتنا لما تعلمنا الكثير .


شكرا لكي أيتها الأشواك

Wednesday, June 04, 2008

إذا تماسكت خيوط العنكبوت استطاعت أن تخنق أسدا


إذا انتظرت تجمع قطرات صغيرة من الأحزان والهموم ستكون كفيلة بقتل السعادة داخلك


مواقف صغيرة لا تعجبك ولا تستطيع آن تتقبلها كفيله أن تفسد العلاقة بينك وبين صديقك إذا تركتها تكبر داخلك دون ان تشعر .


فأسوء المواقف عندما يختلف اثنان ويعد كل واحد منهم للأخر ما عاناه مع صاحبه على مر تلك العلاقة وكأن كل واحد منهم ينتظر تجميع نقاط كي يواجه بها صاحبه .


وفي اغلب الأحيان تقتل تلك الخيوط الرقيقة والمواقف الصغيرة ذلك الأسد العظيم او تلك العلاقة الجميلة.


فإذا كان من كتم دائه قتله ومن كتم داء غيرة فيه قتله أيضاً .


فلا تحقرن صغيرةً إن الجبال من الحصا

Tuesday, June 03, 2008

وجنوني ده عين العقل


أحد اصدقائى المجانين كتب بوست مجنون يتحدث فيه عن فعل مجنون قام به وعلشان كلنا نكون في الهوا سوا مرر لى تاج يقول فيه


هل سبق آن فكرت في أفعال مجنونه ؟

هل نفذت احد هذه الافعال ؟ ما هو رد فعل من عرف بتلك الافعال ؟ وهل علم بها احد ؟

ما هو احساسك بعد ان قمت باحد الافعال المجنونه ؟

هل ندمت على فعل جنوني قمت به كاد ان يودي بحياتك ؟هل سبق ووقفت اما مرآه لتقول لنفسك انك مجنون ؟


====================
هل سبق آن فكرت في أفعال مجنونه ؟
كتييييييييييييييييييييييييييييييييييييييييييييييييييييير


هل نفذت احد هذه الافعال ؟

بصراحة نعم ولم أتردد لانه عادتاً في الجنونلا اتردد بس في مواضيع العقل
انا أكثر المترددين

ما هو رد فعل من عرف بتلك الافعال ؟ وهل علم بها احد ؟
اللى عرف اتهمني اني مش عاقل ومتسرع ومجنون .


ما هو احساسك بعد ان قمت باحد الافعال المجنونه ؟
احساس أكتر من رائع ، كفايه انك عملت حاجه الناس بتقول عليها جنون .


هل ندمت على فعل جنوني قمت به كاد ان يودي بحياتك ؟
بصراحة انا عمري ما عملت حاجة كادت ان تؤدي بحياتي هي كانت هتودي بحياة صحبى ومش مشكله احنا الصحاب يعني فدايا


هل سبق ووقفت اما مرآه لتقول لنفسك انك مجنون ؟
مش مرآة بس... انا الأصل فيا إني بحب المجانين والجنون بس بقالى كتير مطفي شويه مش عارف مالى ادعولى ربنا يهيدني واتجنن تاني

Sunday, May 25, 2008

علي بابا طلع حرامي


مفيش حد فينا تقريبا مر بطفولته الا وسمع قصة على بابا والأربعين حرامي والست مرجانه الله يرحمها ...

وكان على طول اللى بيحكي القصة بيحاول يفهمنا قد ايه طلع على بابا ذكي انه قدر يتجسس ويسمع كلمة السر (أول جريمة )


ويدخل المغارة من ورى الحرامية (ازاي تدخل مكان مش بتاعك من غير ما تستأذن تاني جريمة )


وبعدين وبكل ذكاء يأخذ الذهب والمرجان والياقوت اللى الحرامية كانوا بيسرقوه من الناس (يعني البيه طلع حرامي وديه تالت جريمة )


وتتوالى احداث القصة لحاد أما الحرامية يستخبوا في جرة وتيجي الست مرجانه وتدلق عليهم الزيت السخن علشان يموتوا ويستريح العالم من شرهم (يعني الست مرجانه طلعت قاتله و سفاحه)

=======


لو فكرنا في بعض المسلمات والموروثات اللي اتعلمنها ممكن نكتشف إنها غلط وفي بعض الأحيان ممكن تكون حرام علشان كده لازم نحاول نفكر في موروثاتنا ونشوف هل هي صح ولى غلط ؟؟


بلاش نقدس الموروثات علشان جايه من زمان وخلاص

وياريت نعود ونعود ولادنا إننا لازم نفكر كتير في اللى بنسمعه ونتعلمه علشان نعرف ده صح ولى غلط...


أصل مش كل الابطال اللى افتكرناهم أبطال طلعوا أبطال ...



تصبحوا على خير

Sunday, May 18, 2008

العادة قد تكون أفضل خادم أو أسوأ سيد


عندما نعتاد على شيء ما ..... نفعله دون أن نشعر...حتى وان كان حراماً


قد تكون تلك العادة شيء يجعل الآخرين يحبوننا


وقد يبغضنا الناس لما نفعل دون أن نشعر اننا فعلنا


هل فكرنا يوما فيما نقوم به دون أن نشعر هل هذا صواب أم خطأ ؟؟


هل قيمنا أفعلنا أم أن عادتنا دائما فوق القانون ؟


وهل فكرنا يوما.... هل عادتنا خادمة لنا فنحن من يأمرها وينهاها ؟


أم أنها سيد علينا فلا نقوى على عصيان أمرها؟؟ بل أحيانا تكون اله لا يعصى...


وحينها نكون أسرى لعاداتنا التي ربنا نخسر من أجلها أعز ما نملك لمجرد انها سادت علينا ....



نصيحة اجعل عادتك خادم مطيع لك وإياك أن تسودك عادة فلا تستطيع عصيانها لانك مؤكد ستخسر كثير.


Wednesday, May 14, 2008

أناس يعيشون بحبنا ولا نحبهم ....

كثير ما نجد أنفسنا في مأزق ففلان أو فلانة يحبنا بجنون وقلوبنا للأسف تعجز عن تبادل تلك المشاعر معهم ...

فهل الأفضل أن نقرب هؤلاء منا لينعموا بحبنا ثم نفاجئهم أننا لا نستطيع تبادل الحب معهم ؟؟

أم الأفضل أن نبني سورا بيننا وبينهم ليعلموا دائماً أننا لا نستطيع تبادل تلك المشاعر معهم ؟؟

هل حقا لا يجب علينا أن نتجاهل هؤلاء الذين يحبوننا ويشتاقون لنا ويهتمون بنا حتى لا نستيقظ يوماً ونكون حينها قد أدركنا أننا أضعنا القمر حينما كنا نعد النجوم ..

عجبا لقلوبنا

أناس نتمنى أن نحبهم ولا نستطيع

وآخرين نتمنى آن يحبونا ولا يستطيعوا
صديقي أسف أعجز عن مساعدتك في تلك القضية فلا نصيحة لدي

Saturday, May 10, 2008

وداعاً فسدقة


فسدقة ستغادرني بعد ان أمضت معى أربع سنوات



قابلت فيها أحب الناس إلى قلبى وأبغضهم اليه



أحببتها كثيرا لانها كانت دائما مكاني وانا حزين وهائم



حتى عندما كنت أشعر ان الدنيا لا تسعني من سعادتي فكنت أحب أن تشاركني تلك اللحظات




سيارتي رقصت فيكي وضحكت فيكي وبكيت فيكي



والان أصبحتي ملكاً لغيري ولا أدري ماذا سيفعل بك ؟؟



هل سيحبك كما أحببتك ؟



هي سيدرك قيمتك الحقيقة ام أنه سينظر اليك كسيارة فقط ؟؟




هل سيدرك انك تشعرين بصاحبك وأنك تسانديه ما هو فيه ؟




فلست مجرد سيارة



الى كل لحظة حب قضيناها سوياً.



والى كل لحظة الم شاركيني فيها ...




والى كل ضحكة ضحناها سوياً



والى كل يوم قضيناه سوياً.....



سلام عليك



سيارة وحبيبتي سافتقدك كثير ....

أحبك

Monday, April 28, 2008

الصح في الغلط


كتير اوي بنتمنى حاجات طول عمرنا ....وبنستغرب أوي لما تجلنا او تحصلنا في وقت نكون مش مستعدين ليها فيه فمبنفرحش بيها زي ما كنا بنحلم نفرح بيها ...

وكتير بنكون خايفين من حاجه تحصلنا وفعلا تحصلنا بس في وسط ظروف أصعب منها كتير فمنتألمش منها زي ما كنا فاكرين ...

بنسمع ان حد قابل الانسان الصح في الوقت الغلط

أو قابل الانسان الغلط في الوقت الصح

أو جاله حاجه تفرحه في وقت هو معندوش استعداد يفرح

أو جاله خبر بهدله في الوقت اللى كان مستني فيه حاجات تفرحه ...

قعدت افكر في الاحوال ديه كتير ولاقيت ان أجمل حاجه اني أعمل زي ما صديقتي نصحتني عيش حياتك اللحظة بلحظتها..
لو عشنا حياتنا بالتاريخ اللى عشناه قبل كده ممكن منكونش مبسوطين أوي علشان الزمن إتجاة واحد اجباري رايح بس مش بيرجع

ولو عشناها باللى احنا متوقعينه ممكن برده منكنش مبسوطين اوي علشان ده في الاخر توقع ..

لازم نعرف ان الدنيا مش بتدينا كل اللى إحنا عايزينه في الوقت اللى إحنا عايزينه والا مش هيكون في داعي لوجود جنة نسعى لدخولها ...

يبقى ارضى بحالك و عيشها كده زي ما هيا فيها ابتسامه وفيها أه فيها أسيه وحنيا ....

Saturday, April 19, 2008

إن العين بالعين تجعل العالم بأكمله أعمى


لو أخطأ عليك أحد الناس يوم من الايام فقررت أن تكون مثله وترد عليه ما فعل كما فعل أصبحتم سواء .


ولو خانك أحد الناس فقررت ان تكون مثله وخنته وفضحت أسراره التي أستودعك اياها أصبحت خائناً مثله..


لو تعاملنا مع الناس كما يعاملونا لأصبح للناس كلهم سلوك واحد ...


فاذا كان من حقك أن ترد الظلم عنك فلا تنسى أن ترده بما تربيت عليه من معاني فالياسمين يفوح شذاه وإن قتل الف مرة ...


ولا تجعل سفالة الناس تفضح سفالتك

فالله يحب المحسنين

Wednesday, April 09, 2008

قرراتنا الخاطئة


نتردد كثيرا قبل إتخاذ أي قرار كبير في حياتنا وبعد اتخاذ القرار نرهق انفسنا أكثر بتقيم القرار هل كان صواب أم خطأ ؟؟


ويشتد بنا الحزن اذا كان قرارنا خطأ وكأننا يجب الا نخطئ ويجب ان تكون قراراتنا صائبه دائماً بل ونحاول اقناع انفسنا بمبررات اتخاذ القرار الخاطئ ....


السنا بشر السنا نصيب ونخطيء الم يعطي ديننا أجر لم اجتهد واخطأ (فاشترط الاجتهاد ولم يشترط الصواب)


فاتفكير في قرراتنا شيئ رائع ولكن عندما يسلب منا متعه الحياة يصبح وبال ...


فكما قال احد الحكماء قرراتنا الصحيحة تأتي من الخبرة والخبرة تأتي من قراراتنا الخاطئه ....

فلا تحزن

Monday, March 17, 2008

كثيراً ما نرى الأشياء على غير حقيقتها لأننا نكتفي بقراءة العنوان فقط


كم أخطأنا في فهم الناس لأننا افترضنا ما يريدوا أن يقولوا قبل أن نسمعهم .

كم مرة نهرنا فيها شخص لاعتقادنا انه يريد فعل شيء وهو يريد فعل شيء أخر .

وكم أخطأنا في تفسير أناس لأننا نكتفي بقراءة العنوان ونترك لب الموضوع ..

فظلمنا للناس يحدث لأننا لا نسمعهم حتى النهاية بل نكتفي بافتراض ما يريدون قوله أو فعله فاعتمادنا على تاريخنا -مهما كان -مع الناس غالبا ما يكون ظالم ..

نصيحة
عود نفسك إلا تتكلم حتى يفرغ من أمامك من حديثة وتكون قد تأكدت من فهمه وبعدها تكلم ..
لا تعتمد على ذكائك في الحكم على موضوع من عنوانه فالتفاصيل قد تغير حكمك ...

اعتذار
إلى من حكمت عليهم قبل أن أسمعهم حتى النهاية ..
إلى من فسرت كلامهم قبل إن يفسروا ما يريدوا قوله..
إلى من ظلمت لافتراضي فيهم غير الحقيقة

انا أسف

Saturday, March 08, 2008

صوت الرصاص


لو عندك كلمة محشورة في زورك عايز تقولها علشان الصح انك تقولها بس خايف تقول ...

قول ومتخفش ..

لو عندك قرار لازم تأخذه ومش عارف تأخذه علشان خايف من اللي أنت مش شايفه

خد القرار ومتقلقش ...

لو فيه حاجه نفسك تعملها (وهي طبعا مش حرام) ...

اعملها ومتقلقش من عواقبها ....

لو هتخرج من دائرة الأمان اللى أنت عايش فيها وتطلع للطل

أطلع ومتخفش ...

المهم متقلش ومتخفش وجمد قلبك ولا تخاف من صوت الرصاص فالرصاصة التي ستقتلك لن تسمع صوتها ...


البوست ده إهداء لكل متردد

أصلي أترددت كتير قبل ما أكتب البوست ده

Tuesday, March 04, 2008

والله بتفرق كتير

بجد مش عارف اكتب ولى كلمة عن الفيديو اللى انا حاطه تحت ....




اصله قال كل اللى عايز اقوله ....




شوف وهتحس بيه اوي ....


وهتستمتع بيه أوي .....






video

في التلفزيون والسينما يفوز الطيب ، في نشرات الأخبار يفوز الشرير


دائما لما ينشوف أي فيلم شر أو دراما أيا كان جنسيته (مصري ،أمريكي ، هندي) بنكون مستنين أخر مشاهد الفيلم علشان البطل اللى حبناه طول الفيلم واللى أنضرب 100 رصاصه يطلع لابس قميص ضد الرصاص ويعيش

أو يتقبض على تجار المخدرات اللي ضيعوا الشباب

أو يتم كشف الفساد وبتقبض على وزير فاسد

حتى في فيلم اللى بالى بالك الكوميدي اللي سرق البلد مهربش بفضل اللمبي

المهم إن الخير دائما هو اللي بيتنصر في الأفلام علشان كده عشاق السينما والتليفزيون كتييييير يمكن علشان بيشوفوا فيها الواقع اللي مش عارفين يشوفوه بره ..

نشرة الأخبار بقه غير كده خالص الشر في الأغلب هو اللي بيفوز

فعلا بقيت مش فاهم

في التلفزيون والسينما يفوز الطيب ، في نشرات الأخبار العالمية يفوز الشرير

مش عارف مين اللي صح فيهم بالتأكيد الجرايد ويتوع نشرات الأخبار بيسرحو بينا ..

علشان الخير هو اللي بينتصر مش الشر

مش كده ولى انا غلطان

لك الله يا مصر لك الله يا فلسطين لك الله يا تونس لك الله يا سودان لك الله يا سوريا لك الله يا لبنان........ الخ

Sunday, February 24, 2008

عندما تبكي السماء ........ تضحك الارض


عندما نرى السماء سوداء غاضبة باكيه تٌغرق الأرض بدموعها....

وعندما نسمع صوت الرعد وكأنه زفره غضب .
ونرى البرق وكأنه نظرة شر تنظرها السماء إلى الأرض .

لا ندرك حينها أن تلك الدموع ما كان للأرض أن تضحك بأزهارها وبأشجارها بدونها.

وكأن البكاء ما خلق إلا ليعلمنا كيف نضحك .

وكأن السواد الذي نراه كثيرا في حياتنا ما هو إلا ميلاد ألوان جميلة من الزهور.

فما كنا نظنه بكاء كانت الضحكات تختبئ خلفه ....

والصوت الذي كان يخيفانا (الرعد) ما كان إلا أصوات تغريد طيور قادمة

فإذا رأيت السماء باكيه فاعلم أن خلف البكاء ضحكات قادمة.
وإذا بكت عيناك فاعلم أن هناك سعادة مهرولة إليك ولكنك لا تراها .
وإذا كنت في عسر فهنيئاً لك يسريين
.


فكرة البوست من البيت التالي
إن السماء إذا لم تبك مقلتها... لم تضحك الأرض عن شيء من الزهر

Saturday, February 16, 2008

منتخب الساجدين!!


الفترة اللى فاتت جالى ميلات كتير أوي عن منتخب الساجدين وازاي قدر الفريق المصري اكتساح البطولة عن جدارة لقربه من الله .....

مش عارف ليه اضايقت من فكر الناس اللي بالطريقة ديه.....
يمكن علشان الناس مقدرتش تفرق بين واحد اجتهد كويس فنجح وبين واحد بيسجد فنجح ....


مش عايزين ندخل المواضيع في بعض ..... كلنا بنصلى وبنسجد ورغم كده مش عارفين كدول عربية إسلامية نكون في صدارة العالم ولا ننجح في أي حاجة علشان مش عايزين نتعب ونشتغل بنكتفى اننا شعوب الساجدين ...

جميل انه يكون هناك لعيب متدين وقدوة للشباب في علاقته مع ربنا ولكنه ليس منتخب الساجدين من فاز .... بل منتخب المجتهدين الذي فاز .

بدل ما نعلم ولادلنا ان اللى بيسجد بينجح نعلمهم انه اللى بيجتهد بينجح في الدنيا واللى بيعبد ربنا وبيسجد بينحج يوم القيامة ....

احد المواقع الجميلة نشر أن الفريق انتصر علشان ابو تريكه متضامن مع غزة مع إني اعرف واحد ممكن يكون متضامن مع غزة اكتر من ابو تريكه بس مش لاقي شغل بس الفرق اللى بينهم ان ابو تريكة اجتهد وعبد ربه والتاني عبد ومستني النجاح ..

ممكن تكون الافته ديه لفته جميلة من ابوتريكه انه تضامن مع الشعب الفلسطيني ولكنك يا ابو تريكه لولا اجتهادك لما كنت ابو تريكه ولولا نجاحك ما أثرت في الناس ..

ممكن كلامي ناس تزعل منه بس حبيت اصلح مفهوم ممكن ناس تنشرة غلط وعلى راي اجدادنا من جد وجد .


واخيرا مبروك للمنتخب المصري

Monday, February 04, 2008

صديقك إذا ابتسم وإذا بكى


ما أجمل هؤلاء الأصدقاء الذين يعرفون متى وكيف يتسللون داخلنا ليمحو همومنا ..


فكثير منا (وأنا منهم ) يحب كتمان همومه فلا يتكلم فيها مع احد إلا لمن بيده الإجابة عما يشغله وإذا كان هناك سؤال لا إجابة له فغالباً ما يلتزم الصمت ...
ولكن هناك من الأصدقاء من يبرع في نقل عدوى السعادة إليك فلا يسمع خبر يسعده أو يسعدك إلا ونقل إليك فرحته فالسعادة معدية ..
ولا يجدك كذلك مهموما وصامتا إلا وبدأ يبحث عن سبب همك لا للفضول ولكن ليتسلل إليك بصمت محاولا فك حصار الحزن عن قلبك .

أيها الأصدقاء من حق أصدقائكم أن يشاركوكم أفراحكم كما ترون أن من حقكم مشاركتهم همومكم .
كما من حق صديقك عليك أن تبحث عن سبب همه دون أن يطلب منك مساعدته على أن تراعي خصوصيته .

خلاصة الكلام
إذا ابتسم صديقك فعليه أن يذكر لك السبب وإذا بكى فمن واجبك أن تبحث أنت عن السبب..

Tuesday, January 29, 2008

شكراً أيها السادة

شكرا سيدي الرئيس لسماحك بترك معبر رفح مفتوحاً والسماح للفلسطينيين بالعبور .
اخيرا حصل موقف مصري حسسنا ان لينا كلمة بعد ما كنا بنغني
ولى حتى نص كلمة





شكرا أبو التريكة ألاعب الخلوق على موقفك البسيط الرائع في مساندة إخوانك في غزة أخلع لك القبعة احترما لك



منتخب مصر القومي في غانا مع إني مليش في الكورة بس فعلا استمتعت بأدائكم جداً ....



إلى صناع الأمل والبسمة شكرا لكم

Tuesday, January 22, 2008

صديقي الغبي


...جميل أن يكون لك شخص يحبك أو صديق وفي

وهؤلاء هم الكنز الحقيقي في الحياة

ولكن هل يمكن أن تسمر في حبك لصديق لك وهو أحمق ؟

هل تخيلت شخص يحبك يفسد عليك فرحتك لأنه يريد إسعادك !

هل تتخيل شخص لكي يقترب منك أكثر يثير استيائك فتبعد عنه ويتسائل ماذا فعل ؟؟

سمعت عن حكمة تقول عدو عاقل أفضل صديق أحمق .

فأحسست بما عاناه صاحب تلك الحكمة الخالدة رحمة الله ألف رحمة

بالرغم من أسلوبي الواضح ولكني بكل أسف أعلم أن صديقي العاقل لن يفهم قصدي من رسالتي ولكني على الأقل حق لي أن اعبر عما فيا .

Sunday, January 13, 2008

لا يستطيع أحد أن يركب ظهرك ..إلا إذا كنت منحنيا


إذا كنت منحنيا وأنت حر.

ووجدت أناس يعتلون ظهرك وأنت راض.

ورأيت حقك يسلب منك عنوة وأنت صامت .

ورأيت نفسك ترضى بفتات الموائد وأنت قانع .

وإذا أصبحت ترقص طربا على أغنية أنا عايش ومش عايش وأنت سعيد

وإذا كنت تتمارض بمرض الغيبوبة لتنسى ما أنت فيه وأنت صحيح .

وإذا كنت تخاف ممكن يفترض منه حمايتك!!
فاعلم انه لم يجرأ أحدهم على ركوب ظهرك لولا انحنائك.
وانه لا أحد أستطاع إهانتك... إلا بمساعدتك.

Monday, January 07, 2008

لا تكف عن الابتسام حتى ولو كنت حزيناً, فأحدهم قد يقع في حب ابتسامتك

video

إذا كان البرد معدي ....
وإذا كنا لا نعانق من أصيب بالبرد حتى لا ينتقل ألينا الفيروس

فالبسمة أيضا معدية

وهي أسرع انتقالا إلى قلوب الناس من البرد .

والعبوس والحزن كذلك ..

فكم مرة كنت في غاية السعادة وقابلت شخص حزين أو مكتئب عبس في وجهك أو قال كلمة واحدة أطفئت ابتسامتك !!

وكم مرة كنت حزين سمعت ضحكة طفل صغير وهو يضحك ببراءة أو رأيت بسمة صادقة فنسيت همك .

فما أروع من ندمن ابتسامتهم ونقع في حبها حتى لو لم نحب أصحابها بنفس الدرجة فإذا رأينهم عابسين أصبنا بالحزن ..

فالابتسامة واجب اجتماعي .


ولو عايز تتأكد أن الابتسامة معدية شوف الفيديو

Tuesday, January 01, 2008

لا تخجل من إعطاء القليل, فالحرمان اقل منه


حد فكر قبل كده والدنيا برد وهو مكلفت في 20 بطانية إن فيه ملاين نايمين من غير غطى في الشارع .

حد لما بيحزن او بيعيط ويلاقي حد بيطبب عليه سواء أم أو أب أو أخ أو حبيب أو حتى صحابه البلوجرز إن فيه ناس بتعيط دم والناس بتتفرج عليها في الشارع ومحدش بيعبرها علشان شكلهم مش مستحمي .

حد جرب يصحي الصبح جعان ميكنش معاه ثمن فطاره

حد جرب يكون لا قدر الله تعبان والمستشفيات الحكومة مش عايزة تدخله من بابها وهو عمال يصرخ على باب المستشفى من الألم وبرده محدش بيعبره .

اعتقد إن كتير مننا لسه ميعرفش يعني ايه حرمان لو بص للناس ديه

صعب أوي ان الواحد يكون عنده حرمان الأمان وحرمان المأوى حرمان الحنان والحب في نفس الوقت .


نصيحة ليا وليك:-
ماتستقلش أي فكه او فلوس او حتي بواقي أكلك اللي ممكن تديها للناس ديه فالحرمان أصعب

كلمة حلوة منك او طبطه هتفرق معاهم كتير

ممكن لما تعيش شوية هموم الناس ديه تحس ان همومك ديه مسمهاش هموم

ولما حد فيهم هيبتسم هتحس اد ايه انت عظيم ..


( ثم لتسألن يومئذ عن النعيم )