منتخب الساجدين!!
الفترة اللى فاتت جالى ميلات كتير أوي عن منتخب الساجدين وازاي قدر الفريق المصري اكتساح البطولة عن جدارة لقربه من الله .....
مش عارف ليه اضايقت من فكر الناس اللي بالطريقة ديه.....
يمكن علشان الناس مقدرتش تفرق بين واحد اجتهد كويس فنجح وبين واحد بيسجد فنجح ....
مش عارف ليه اضايقت من فكر الناس اللي بالطريقة ديه.....
يمكن علشان الناس مقدرتش تفرق بين واحد اجتهد كويس فنجح وبين واحد بيسجد فنجح ....
مش عايزين ندخل المواضيع في بعض ..... كلنا بنصلى وبنسجد ورغم كده مش عارفين كدول عربية إسلامية نكون في صدارة العالم ولا ننجح في أي حاجة علشان مش عايزين نتعب ونشتغل بنكتفى اننا شعوب الساجدين ...
جميل انه يكون هناك لعيب متدين وقدوة للشباب في علاقته مع ربنا ولكنه ليس منتخب الساجدين من فاز .... بل منتخب المجتهدين الذي فاز .
بدل ما نعلم ولادلنا ان اللى بيسجد بينجح نعلمهم انه اللى بيجتهد بينجح في الدنيا واللى بيعبد ربنا وبيسجد بينحج يوم القيامة ....
احد المواقع الجميلة نشر أن الفريق انتصر علشان ابو تريكه متضامن مع غزة مع إني اعرف واحد ممكن يكون متضامن مع غزة اكتر من ابو تريكه بس مش لاقي شغل بس الفرق اللى بينهم ان ابو تريكة اجتهد وعبد ربه والتاني عبد ومستني النجاح ..
ممكن تكون الافته ديه لفته جميلة من ابوتريكه انه تضامن مع الشعب الفلسطيني ولكنك يا ابو تريكه لولا اجتهادك لما كنت ابو تريكه ولولا نجاحك ما أثرت في الناس ..
ممكن كلامي ناس تزعل منه بس حبيت اصلح مفهوم ممكن ناس تنشرة غلط وعلى راي اجدادنا من جد وجد .
واخيرا مبروك للمنتخب المصري
56 comments:
اعتقد أن المشكلة ان النوذجين مكنوش يجتمعوا مع بعض للأسف او مكنش ظاهر للناس
تلاقي واحد كويس في شغلة بس مش متدين
وواحد متدين وهامل الشغلة
الجميل في الموضوع أن الاتنين يجتمعوا مع بعض لان هنا بجد معنى السعي الحقيقي اللي ربنا أمرنا به
حلو البوست على فكرة قوى ......... وكل الجرايد كانت بتجيب صور للمنتخب وهو بيصلى بس .....مش عارف ليه .. حتى مش جابوهم وهما بتدربوا اكنهم كانوا بيصلوا قبل الماتش ويخشوا يكسبوا
واحشنننننننننننننى
سوما 2010
اه معنى السجود ؟؟؟؟؟؟؟
معنى السجود إني أعمل اللي عليه كويس قوي ،، وادعي ربنا وانا ساجد من قلبي قوي قوي ،، فيكون جنبي ويستجيب لي
فيه فرق بين التوكل ( يعني أعمل اللي عليه وأسيب الباقي على المولى عز وجل ) ،،، لكن التواكل أني أسيبها
على ربنا وبس من غير ما أخد بالأسباب
فيبقى اسم الفريق (المتوكلين ) أي العاملين الساجدين
السلام عليكم و رحمة الله و بركاته
فعلا عندك حق
في فرق كبير جدا بين اللي اجتهد و خد بالاسباب و عشان كدة ربنا كافئه و وفقه فنجح و بعد كدة سجد شكر لربنا انه وفقه انه ياخد بالاسباب
و فرق كبير بين اللي بيسجد من غير ما يجتهد أو بيعمل جهد قليل
أوافقك الرأي بشدة
صحيح فرحت اوي لما شفتهم بالأداء ده و بالإيمان ده
لكن اتضايقت لما الناس حصرت نجاحهم في سبب الإيمان فقط
المسلم بيطير بجناحين إيمان + عمل ما ينفعش يعتمد على جناح واحد في الطيران أبدا
و الدليل انه لو كنا ما كسبناش لا قدر الله كانوا هيقولوا ده ربنا بيختبرنا زي ما كتير بنعلق مشاكلنا و تقصيرنا في العمل على ابتلاء ربنا لينا
أحييك على اللفتة
و أولا و أخيرا مبروك لمصر الحبيبة
:)
هقولك على حاجة المنتخب السنة دى وفى البطولة دى بالذات
اظهر شئ
ان الانسان كل ما (اجتهد) و( وثق فى ربنا )واتقرب ليه
هيحصد نتيجة تعبه وبالتبعيه هيكون فى توفيق كبير من ربنا سبحانه وتعالى
يعنى المنتخب فعلاً اجتهد واجتهد جامد
وكان السجود دائماً بيأتى بعد الجون او الفوز
كشكر لله واظن ان وقتها مينفعش الامور تلتبس على البعض ويقولوا انهم ساجدوا وبس فنجحوا وحصدوا النجاح
!!
اما بخصوص اللفته اللى ابو تريكة عملها
فالجميل انه استغل عمله اياً كان فى توصيل رساله معينة سواء للشعب الفلسطينى او العالم كله
واظن ان دى حاجة كويسة جداً :)
:)
تحياتى لك
يمكن ده الفرق بين التوكل على الله وبين التواكل اخى احمد
فالفرق بين الاثنين شاسع وكبير
الاجتهاد والعمل ثم النجاح بتوفيق من الله غير الجلسو انتظارا لنجاح لن يأتي لمجرد العبادة
ده حتى المثل بيقول اسعى ياعبد وانا اسعى معاك :)
في (سلو الاجانب ) الاجتهاد هو سر النجـاح ...
اما في سلو بلدنا او الي المفروض يكون
هو
الاجتهاد و الشغل ثم التوكل على ربنا
والثقه فيه ... باعتبار
القاعده الـ الاهيه الجميله
"ان الله لا يضيع اجر من احسن عملا"
دي مش بتاعت المسلمين بس ... بتاعت كل النـاس ... بس الفرق انه لما يكون
مسلم ومتوكل على ربنا ودايما بيشكره
النجاح بيكون له طعم مختلف ..
و ثــواب مختلف .. مش في الدنيا وبس
وممكن يحس حجات غيره من غير توكل وشكر محسهاش
متفقه معاك جدا في وجهه النظر الي بصيت للامور منها ...
احترامى الكـامل
يا صديق السـعاده
يااااااااه الواحد ارتاح اوى..........وكأن الواحد مستنى يقرأها على المدونة عشان يفهمها
ربنا يكرمك.
تنويه في محله يا عم احمد
بتعجبني دماغك
:)
Salma Amer
كلامك صح اوي بس ممكن الاعلام والملتزمين عمالين يتفخوا في جاتب السجود وسايبين الاجتهاد .....
elkamhawi
علشان كده بحاول انور الجزء الظلمة اللى ناس كتير متكلمتش عنه ....
سوما 2010
بس انا كنت حابب اننا نكبر الجزء الخاص بمجهودهم العبادة ديه ربنا من يثيب عليها والتوكل عبادة لله بس انه غلبوا ده علشان اجتهدوا ....
ولى انا غلط
غراب
وبرده لو انت اجتهدت ومسجتش هتنجح في الدنيا بس لو اجنهد وسجدت هتنجح في الدنيا والاخرة ...
فالسجود يدخل الجنة ...
الحلم العربي
كلامك رائع رائع تسلم ايدك على الكومنت الجميلة مع اني زعلان من انقطاعك فترة با بنت اللذين....
مبروك لمصر
noha
صح اوي السجود اتي بعد النصر والدعاء بعد وقبل واثناء النصر والاجتهاد هو سبب النصر ...
لفتت ابو تريكة كانت اكثر من رائعة ورسالته وصلت للقلوب لانها كانت من قلبه
همسة قلم
يا اهلا يا اهلا ازيك يا اختي بقالك كتير ما شرفتنيش بتعليق ...
صح اوي ابذل الاسباب وانتظر النصر
فوكيره
الله على الكلام اللى يرم العظم ....
صح اوي ان الله لا يضيع اجر من احسن عملا سواء كان مؤمن او كافر ..
هو ممكن نقول ان الفرق ان ربنا قالنا نقول (ربنا اتنا في الدنيا وفي الاخرة حسنة ) اما الناس التانيه بيقولوا (ربنا اتنا في الدنيا حسنة ومالهم في الاخرة من خلاق)
فالسجود للجنة
Anonymous
الراحة ان الواحد يسمع كلام حد زي حضرتك يرد الروح ....
يومك جميل وسعيد
أحمد سلامــة
حبيبي اوي وصحبى اللى لسه ما شفتوش بس قريب لقلبى اولا وحشني اوي ...
لو انا دماغي عجباك فانت على راي مش فاكر مين كلك على بعضك حلو :))
فاكر أيام حرب أكتوبر.. لما قالوا إن كان في ملايكة من السما بتحارب مع الجيش المصري وخلتهم إنتصروا
هي دي طريقة تفكير شعبنا الجميلة وهي حاجة مش وحشة على فكرة.. إنك تقول إن ربنا هو سبب أي حاجة حلوة في حياتنا.. بس زي ما إنت قلت المشكلة إن في ناس بتعبد وتتواكل من غير سعي ودي فعلا المشكلة الحقيقة
صباحك حليب يا بطل ومبروك لمصر :)
RAMA
بصى انا باقول طبعا ممكن يكون فيه ملايكه نزلت حربت معاهم علشان هما نزلوا حرب مع النبى صلى الله عليه وسلم بس قبلها ربنا قال واعدوا لهم ما استطعتم .....
النصر بيجي لما نستعد ونتقى الله والنجاح بيجي لما نستعد كويس ولو جملته بالتوكل هتخد خير الدنيا والاخرة ...
ازيك يا حبى بس انا معترض على جمله( بدل ما نعلم ولادلنا ان اللى بيسجد بينجح نعلمهم انه اللى بيجتهد بينجح في الدنيا واللى بيعبد ربنا وبيسجد بينحج يوم القيامة) لان الاتنين لهم علاقه كبيره ببعض هو الافضل اننا نجتهد و نعبد ربنا عشان ننجح يوم القيامه و لو اجتهدنا فى الدنيا بس هننجح فى الدنيا لكن مش هننجح يوم القيامه و لو اجتهدنا فى العباده بس مش شرط ننجح يوم القيامه لان فى واجب تانى علينا ومعملنهوش شكراً
عجبني قوي التسمية
وعجبني اكتر تناولك للموضوع
لكن لما الواحد بيجتهد وبياخد بالاسباب مع العلاقة القوية بالله
لازم يتكون النتيجة حتمية وواقعية
فوز ونجاح وحب في قلوب الخلق
يارب تجعلنا من هؤلاء
سلام
الناس مفتقده النموذج اللي قدمه المنتخب أقصد ( نموذج المسلم المجتهد والاعلام يسلط الضوء عليه)
نموذج المنتخب موجود كتير في عالمنا ولكن الاعلام بعيد عنه ببساطه اما انه من الناس المحظورة أو واحد تاني خايف يظهر اسلامه أو يعلنه علشان لا يتم تصنيفه انه اسلامي.
كلامك جيد يا حماده بس الكلامات لم توظف جيدا.
الاسلام ده دين شامل وكلنا علي ثغرة منه فياريت كلنا نعرف العالم المسلم المجتهد الشاطر .
بحب مصر
كلامك سليم يا مستر احمد
لابد من الاجتهاد للوصول للنجاح
والعبادة وحدها لا تكفى لتحقيق هذا النجاح
ولكن لا خلاف ان من "ومن يتق الله يجعل له مخرجاو يرزقه من حيث لا يحتسب "
يعنى تقوى الله تؤدى الى توفيق الله للانسان فى حياته بعد ان يأخذ بالاسباب
(F)
معنى جميل يا مستر
ومازلت مستنى الزيارة
:)
استاذ احمد شرف كبير ليه انك
تشوف البلوج عندى
وتانى حاجه بجد نفسى اعرف حاجه هو عيب اننا نحمد ربنا حتى ولو بنسرق
ِAhmed Maher
حبيبي احنا متفقين مع بعض بس مختلقين في التعبير المهم اننا متفقين ....
نورت عم أحمد
صاحب المضيفة
صح جدا نجاح وحب الخلق ممكن علشان كده بنحبك :)))
يارب يكرمك يارب
مش محتاجة رد يا فندم على طلبك
:)
يكون ليا الشرف انى مدونتى تكون واحدة من المدونات اللى عند عم احمد
:)
Anonymous
اتفق معاك جدا ممكن يكون التعبير خاني ...
بجد شكرا على توضيحك اوي اوي ...
وكلنا بنحبك يا مصر فعلا
بس سيدي انا مش عارف انت مين
Mo3Az
معني كنت ممكن مغفله في كلامي منكم نستفيد يا خببيي ....
وانا كمان مستني الزيارة اوي
صوت من مصر
حبيبي نورت عم أحمد والبلوجات المجاورة كمان ...
انا اللى اعرفه ان حتى الحرامي وهو بيفتح الخزنه بيقول بسم الله .....
مش عارف
noha
الشرف كل الشرف لعم أحمد يا noha
الرسول صلى الله عليه وسلم قال(اعقلها وتوكل )وقال ايضا صلى الله عليه وسلم اذا قامت القيامه وفى يدى احدكم فسيله فليزرعها )او كما قال صلى الله عليه وسلم
يعنى ولا بالسجود لو حده بيجى النصر ولا بالاعداد لان برضه الاعداد الجيد من غير توكل على الله لا يحقق النصر لازم الاتنين مع بعض
بدليل درس هجره الرسول صلى الله عليه وسلم
اخد كل الاسباب واستعان بالله حتى حفظه الله وتمت الهجرة بسلام
نفسى المسلمين ياخدوا عظه من نجاح الفريق القومى ويحاول يستتفيدوا من تجربته
rabna yesabtk ya ahmed .. begad 2ad eh ba2eeeet FED UP mn el nas ely byhtemo bely bara bas !! .. begad 2ad eh afkar el nas ba2eet hashaa !!
masha2 allah ya ahmed .. totally agree !!
متفق معاك مليون في المية في كل كلمة قلتها
تسلم أيدك و دماغك
أتفق معك في كل كلمة
يصح القول أن الله وفقهم بسعيهم و طبعا السجود توفيق من الله
و ربما افتخار بإسلامهم .. انا كمان كنت فخورة جدا بيهم
و هما بجد تعبوا جدا و يستحقوا و اكتر
يعني عاوزة أقول انهم كانوا قدوة كمسلمين أو كما ينبغي أن يكون المسلم
شكرا يا أحمد ع البوست و ف انتظار بوست جديد أتمنى أن يحمل قدرا أعمق من الأمل و التفاؤل لأني محتاجة اقرا حاجة كده بجد
ياعمي في ناس متحبش غير الدروشة والأنتخه والتهليل والتطبيل
بس ساعه الفعل مفيش
و نقول سلام عليكم,
مش هعرف اقول كلام كتير و خاسه ان الاخوه المعلقين كفوا ووفوا :)
بس حبيت أقول متضامنه مه هذا البوست كلمه ..كلمه
:)
معاك حق مليون فى المية
مبروووووك
ياه بقالى كتير مجتش عندك
عامل ايه يا صديقى
اتمنى تكون بخير
وانا متفق معاك فى كل كلمه
أنا آسف للدخول بدون رد ولكن غدا الصيام والقيام والدعاء ضرورى
http://yalaya3mlak.blogspot.com/2008/02/blog-post_24.html
يوم الاثنين صيام وقيام
وانتظرونى بعد غد
رفقة عمر
علشان كده انا بتكلم في المعني ده علشان نبطل دروشة :))
Carnation
thanks a lot for your golden words ...
thanks for raising my morals ....
thanks for being here
على باب الله
يارب يخليك يارب ونتفق على طووووووووووول .
المهم نورت البلوج
إيمان الميهي
تسلم ايدك على الكلام الحلو اوي ....
حاضر ليكي عندي بوست كله امل ...
شكرا ايمان
mohamed
ساعة الفرح زعريط تنطيط وفي المياتم هات يا سويط :)))
Great wishes
ينهر أبيض البوست نور والله زمان يا هندسه انتي فين من زمان اوي اوي ...
والله فعلا البوست كان ناقص كتير بعدم وجودك
بيقولوا سايكو
يارب يفرحك يارب
أسد الدين: عبدالرحمن الحسيني
الله يبارك فيك يارب يا رب دائما
حزيــــــــــــــــــن
انا اسف انا كمان مقصر جدا جدا ..
انا بخير ولا يتقصهني الا اني اشوفك ......
نورت البوست تاني
عمر محمود
ربنا يتقبل منك يارب
يا رجاله البوست ده اتنشر فى الدستور النهارده
وانا اول واحده بلغت احمد
مبروك يا احمد
:)
انا شايف بالعكس يا عم احمد
كلامك مايزعلش حد بتاتا
دا عين الصواب
والله دا اللي بيدور بداخل كل واحد فاهم صح
الجماعة اجتهدوا
وشكرا ربنا بالسجود
غير اللي تواكلوا وانتظروا التفوق
كمان ابو تريكة
اخد بالاسباب في كل حاجة
لما اجتهد
ولما عبر
ولما سجل
و
والله وعلموها الرجالة
Post a Comment