بطٌل تف

مش عارف ممكن الناس تقرف من كلامي بس أصبحت ظاهرة مقرفه فعلا ً

بجد مش مصدق اني ابقى سايق العربية تنزل على القزاز تفه طايره من ميكروباص قدامي

مش مصدق ان ممكن حد متعلم بكل بساطه يقضى حاجته تحت الكوبري والجدع اللي يمشى تحت اي كوبري من غير ما تجيلوا حالة اختناق

ممكن البلد تكون مهببه علشان مصر أصبحت عند أغلب رجال الحكومة مشروع استثماري يكسبوا منه مش دولة يطوروها

بس احنا أزاي بننتقضهم وإحنا زيهم مصر بالنسبة لينا سلة زبالة او مرحاض عام

نتف وتقضى حاجتنا ونرمي الزبالة من الميكروباص أو العربية بكل بساطه

ازاي قبلنا وتقبلنا اننا نعيش قي مزبلة وتبقى الشوارع مبولة كبيرة .

ده لما النبي وصف الأرض وصفها انها مسجدا وطهورا .

الأصل فيها الطهارة والنظافة زي الجامع ولو انت متقدرش تتف او ترمي حاجه على الأرض في الجامع فالأرض كلها جامع

ياريت اللي يقرأ البوست ده ويكون بيتف يبطل تف في الشارع .

ولو كان بيتوجة تحت الكوبري كتير يتعب نفسه يدور على مكان أفضل يعمل فيه كده

وياريت الزبالة نرميها في الزباله حتى لو الحكومة مش حطين اي سلة للزباله في الشارع ندور على اقرب زبالة

والنيل شكله هيكون احلى لو اللي بيعوم فيه بط او اي طير مش قشر لب وعلب بيبسي .