Tuesday, January 27, 2009

مفيش اي يوم في حياتك مش مهم


لما تحس إن الأيام شبه بعض


وتحس بملل فظيع


وتحس انه لا جديد في الحياة


لدرجة انك بتنسى انهرده يوم إيه


أصله يوم مش مهم علشان مفيش فيه حدث يذكر


بس لو مفيش في اليوم حدث غير انك فضلت حي وممتش هتعرف اد ايه اليوم ده مهم بس بعدين


أهم يوم في حياتك هو اللي انت فضلت فيه عايش


أصلك مجربتش اليوم الوحيد اللي هتحس فيه اد ايه ان اليوم اللي كنت كملته لأخره وأنت حي هو أهم يوم.



يومك سعيد

Tuesday, January 20, 2009

كلام في سرك


كلنا عندنا اسرار مش عايزين حد يعرفها


أسرار عايزين نخبيها عن الناس علشان محدش يعرفها


وأسرار بنخبيها عن نفسنا علشان مانركزش إن إحنا نعرفها


الأسرار اللي بنخبيها عن الناس ممكن نكون صح أوي لما نخبيها


الأسرار اللي بنخبيها عن نفسنا بنكون أغبياء أوي لما نخبيها

الكلام ده في سرك

Monday, January 12, 2009

أنا مش محبط



لو حد فاكر فيلم جاءنا البيان التالي كان فيه لقطة محمد هنيدي بيقول لواحد في الشارع


هابي نيو ير يا عم سعيد


رد عليه الراجل بمنتهى التلقائية "أنت عبيط ولى ايه "


وبدأ يسرد مبررات عبط المذيع..... نيو يير ايه !!!!


ممكن نكون كلنا دلوقتي عم سعيد اللي مش عارف من كلمة السعادة غير اسمه


أنا بقول لا


حتي في أحداث غزة اللي كلها موت مش محبط


علشان لو أصبحت محبط يبقى أنا فشلت


حتي ربنا وهو بيحكي لينا قصة أصحاب الاخدود اللي كل الناس اتحرقوا فيها حتي البطل


قال ذلك الفوز الكبير


مكنتش عارف فازو بايه .. بعد كده فهمت


فوزك لازم تعرف تقاوم هموم الحياة وتصمد على مبادئك


فوزك لما تعمل اللي مطلوب منك حتى لو محررتش الكون


فوزك لما تموت وربنا راضي عنك


مش مطلوب منك تحرير غزة مطلوب منك تعمل اللي تقدر تقف بيه قدام ربنا ويدخلك الجنة


لو اتحررت غزة وانت دخلت النار مش هتستفيد حاجه


بس لو عملت اللي عليك ومت علي سريرك وسط أهلك هتدخل الجنة وهتبقى كد فزت .


أوعى تحبط أوعي تعيط وتفضل في مكانك اعمل اللي تقدر عليه وسيب الباقي على اللي خلقك

الكلام ده مش علشان احداث غزة بس الكلام ده في كل حياتك


الاحباط هو احساس العجز وانت عمرك ماهتكون عاجر 100% طالما لسه بتتنفس .


قوم ونفض التراب واعمل اللي تقدر علية قدام اي موضوع تحس فيه انك عاجز وسيب الباقي على ربنا

وافتكردائماً... انت مش محبط ومش عاجز انت محتاج تفكربس هتقدر تعمل ايه في اي موضوع شغلك .

Monday, January 05, 2009

ليه لما بنعمل حاجة صح قليل بيفتكروها ولما نعمل حاجة غلط محدش بينساها .



حكم بشري ظالم ...


لما حد بيعمل فينا 100 موقف حلو بنقدرة وبنحبة بس بننساه بعد شوية


بس غلطة كافية لتدمير ما كان وعذرنا الوحيد مش قادر انسى


أعرف واحد من الصحابة عاير صحابي تاني بأمه وواحد تاني زنى وواحد ثالث سرق بس في الاخر فضلوا صحابة وفي الجنة .


نصيحة
خليك عادل ورحيم وانت بتتعامل مع كل حاجة حواليك في الكون حتى عربيتك لو طول عمرها شيلاك وباظت مرة ما تشتمهاش .