Wednesday, July 14, 2010

ساعات بشتاق


ساعات بشتاق ليوم عشتو وانا صغير ..

لشكلي قبل ما تغير ..

لايام فيها راحة البال ..

عشان كنا ساعتها عيال ..

ساعات بشتاق للحب القديم ..

و لصوت عبد الحليم ..

لنومي في حضني لبس العيد..

و احساسي ان بكره بعيد..

لفنجان قهوه من امي ونا بذاكر..

لفرحه ابويا لما انجح واكون شاطر..

للمة عيلة في الصيف لما بنسافر على مطروح..

لأول لمسة من ايد اللي حبيتها ..

لضحكتها .. ورئتها .. وبرائتها ..

لدمعة في عيني يوم البعد خبيتها ..

وأنا مجروح..

ساعات بشتاق ليوم عشتو وانا صغير..

لشكلي ئبل ما اتغير..

لايام فيها راحة البال ..

عشان كنا ساعتها عيال ..

ساعات بشتاق ..

لخالي وعمي ولجدي ..

لحواديث من بتوع ستي ..

لليلة من ليالي زمان ..

لفرح بيملى كل مكان ..

ساعات بشتاق لبيتنا الكبير ..

ولناس مليانة خير..

لا باتو في مرة يوم شايلين ..

ولا عملو حساب لسنين ..

للعب الكورة في الشارع في حتتنا ..

لأمي وهي بتعيد على جارتنا ..

لرمضان لما بنورو يهل على بيتنا ..

وكل مكان ..

حجات عدا عليها سنين سابت فينا ..

صور جوانا عايشة زي اسامينا ..

ولا الدنيا ولا الايام تنسينا ليالي زمان ..



شكرا يا فؤاد جيت ع الجرح

Saturday, July 03, 2010

على رأي المثل


حد فكر في بعض الامثال والقيم اللى اتربينا عليها من غير ما نحس خد عندك :
ان كان ليك عند الكلب حاجة قولة يا سيدي
دعوة ان يكون الكلب سيدك بدل من ان تكون انت سيداً للكلب يجب أن تكون عبداً حتى تقضى ما تريد .

اليد اللي متعرفش تقطعها بوسها .
دعوة أخرى إلي الشموخ فان كنت لا تستطيع ان تقطع تلك اليد قبلها وقبلها وقبلها .

جوز امي اقوله يا عمي
مع انه لا يستطيع أحد ان يتقبل ان يرى رجلاً مكان أبيه ولكن حاول ان تكون اكثر خنوعا وذلاً وقوله يا عمي حتى لو مش طايقه اصله عمك وعم الشباب .

اطعم الفم تستحى العين
طبعا المثل ده سواء انت كل بتأكل أو بتأكِل لو حد اكلك يكسر عينك ولو أكلت حد تكسر عينة هي ديه القاعدة .

أخيرا
لازم نفكر في حاجات كتير أوي قبل ما نقولها او نعملها ولازم نراجع المعتقدات المتدولة اللي اتربينا عليها وعلى رأي المثل من خاف سلم